السبت، 5 فبراير، 2011

يا مصريين افهموا اللي بيتطلقوا بتحرم عليهم يعيشوا مع بعض

يا كل واحد عايز البلد تهدي عشان خايف من خرابها انا مع كلامكم جدا ولما مبارك طلع انا وافقت جدا على كل اللي قاله زيي زي ملايين وكلمت اصحابي في التحرير قولتلهم خلاص الحمد لله عايزين ايه اكتر من كده وفيه ناس اتحركوا فعلا وروحوا لكن بعد اللي حصل و الناس اللي اضربت و ماتت اظن اقل ما يقال انها خيانة ولو مبارك مايعرفش على الاقل كان برأ نفسه من دم اللي ماتوا و اتبهدلوا ده ماطلعش اتكلم كلمه و لا طلع بيان واحد ولا ظهر سايب ناس تانية لسه مايعرفوش راسهم من رجليهم مع كل احترامي ليهم يتكلموا اي كلام مش لأنهم هبل لكن لأنهم معندهمش خلفية ايه اللي بيحصل او عارفين و في موقف يحسدوا عليه حاطت ناس محترمين اه بس هيتظلموا وهو بعجرفتوا المعروفه مفتحش بقه وكأنه بيقول (الكلاب تعوي والقافله تسير) دم الشهداء دول مين هيدفع تمنه؟؟؟ مين اللي اتسبب فيه؟؟؟
محدش بيرد
انا مع ان الناس تتفق و مايحصلش فوضة لأن فيه ناس كتييير ممكن تستغل موقف الشباب بس الحل اننا نكون يد واحدة ونعين ناس مراقب عليهم من مجموعه اخرى يتكلموا باسم الشعب يعني مجلس (شعبي) بس حقيقي مش كدة وكدة وهم يرشحوا حد لاستلام السلطة بشكل مؤقت لحين اجراء انتخابات و ينزل مبارك عن الحكم بطريقة مفيهاش هرجلة وده مش صعب في ظل وجود رئيس وزارة و نائب ومجلس شعبي محترم

هم اللي بيضحكوا على عقول الناس بأنه صعب و انه هيحصل فوضة طيب وايه اللي بيجري دلوقتي؟؟؟؟؟ فين الأمن ؟؟؟ ماتوا كلهم؟؟؟ فين الوزير الجديد بتاع الداخليه؟؟؟؟ فين لاعتذرات والتصريحات؟؟؟ فين صفوت الشريف اللي بهدل الدنيا عشان فاكر اننا شوية كلاب هنهوهو وبعدين نسكت؟؟؟

نسكت على ايه و نوقف ونرجع الشباب البيوت ليه ؟؟؟ بلدنا مش هتضيع لو وقفنا مع بعض بنظام وصححنا وضعنا
ماتصدقوش انه الاخوان هيمسكوا الحكم و انهم هم اللي بيشعللوها لان الشعب مش عايز الاخوان و ده كان واضح جدا في كلام كل الناس
ولا تصدقوا مسلسل ان اوباما بيوزع فلوس هو و اسرائيل واقفة عالناصية بعربية هامبرجر
لان احنا مش شعب عبيط احنا فاهمييين كويس مين اللي معانا و مين اللي بيسخن و مين اللي ضدنا ولا امريكا ولا اسرائيل كانوا يتوقعوا ده مننا واهو اتضرب النهارده خط انابيب الغاز اللي رايح لاسرائيل يا ترى ده كان في مصلحتهم؟؟؟؟ ياناس صحيح عايزين بلدنا ترجع صح و حلوة بجد مش زواء من برا و خراب و موت و اكل من الزباله و عشوئيات من جوة دي فرصتنا ومشوار الألف ميل بيبدأ بخطوة واحنا مشينا خطوات ثابته عايزين تهدوها ليه اللي مش عايز يشارك و خايف على اسرته من الجوع باقوله يا اكلت واللي خايف على العيال و المدارس بقوله مستقبل ولادك اهو شبابنا بيبنيه واللي ممش عايز عشان البنك قافل والاي تي ام ماشين مش شغال اقوله ارحمنا وبطل انانية اصحوا يا شعب بلدنا بتتولد مستقبل ولادكم بيتبني مش عايزين تشاركوا مع انه واجبكم اعملوا اي حاجه تانية شاركوا بيها وادعو لولادنا اللي في الميدان ربنا يحميهم و ينور عقولكم

هناك تعليق واحد:

Tears يقول...

معاكى حق فى كل كلمة


ربنا ينور عليكي دايما

أرشيف المدونة الإلكترونية

من أنا

صورتي
واحدة بتموت في ارض مصر و حاسب اللي يتهور يتعور