الثلاثاء، 7 فبراير 2012

نداء


رسالة لكل مصري اكل من خيرها و اتفلي في منديلها علي طريقة عوكشة وعلي طريقة طيطو كمان هاقول لكم ايه يعني اضراب ده بيحصل في كل الدنيا و هنصرف لكم التعويضات،،،،،
انتم عارفين انتم خايفين من الاضراب ليه ؟ عشان احنا شعب بيتقاله شيه و ياخد كرباجين بيمشي و يستحمل . احنا شعب ميعرفش يقول لا ..اتعودنا عالسخرة و ضرب البيادة عشان العجلة تمشي ، لا يا شعب ..العجلة اللي انتم فاكرينها هاتمشي عمرها ما هتمشي ..العجلة اللي هتمشي هي عجلة الترويع و القتل و الاعتقالات لأي واحد يتضرب يقول اي ، اي واحد يتهان فيقول حرام ..ده حتي البهايم بتحرن و ماتمشيش ولو حد ما بيفهمش ضربها وقت حرنتها ترفصه تجيب اجله. ما تحسوا باللي بيحصل في بلدنا شويه و بلاش مصالح شخصيه و جبن.. اللي خايف علي بلده لازم يديها زقة قوية هتفضلوا لامتي تكعوا فلوس زبالة والزبالة مابتتشالش هتفضلوا لامتي سفروت
نداء عاجل و هام لبتوع الكنبة والنبي ما تقوموا اليوم دا احنا هنشاركوا نلزق جنبكم الاضراب مش هيموتكم من الجوع لكن السكوت هيموت ولادكم و اديكوا شايفين مش اللي بينزل يقول لا بس اللي بيموت الدور جاي علينا واحد واحد و بطرق كتير واديهم كممه افواهنا بانتخبات حرة و يا عالم هيعمل فينا ايه المجلس الموقر خليني ساكتة و شايلة في قلبي مش موضوعنا عارفين ايه اللي هايموتكم يا بتوع اصبروا شوية ضعفكم و دلدلة راسكم وسط الشعوب طب اللي دلدلوا رؤسهم فالمجلس قطعوا البقرة و اخدوا نايبهم و اطمنوا علي كراسيهم و مضوا معاهدة الغدر وانتم مضحوك عليكم ليه اخدتوا ايه؟؟؟ بعتوا دم ولاد مصر بإيه؟؟؟؟
بلاش الذل هو اللي يموتنا عشان علي الاقل لما نموت نموت بكرامة، عبد الناصر برغم اختلافي التاااااام مع سياسته الا اني افخر انه مصري و الدول العربية كلها عاملة باسمه شارع او ميدان و بالنسبالهم هو الرجل اللي رفع راس مصر برغم انه ما كسبش المعركة لكن مات و هو بطل وبيحلفه برجولته لغاية دلوقتي ربنا يديكم بصيرة ياللي فاهمين الاضراب علي انه خراب التاريخ بيتكتب و الابطال هايتعرفوا و المدلدلين برضه هيتفضحوا لكم الخيار عايزين تبقوا في صفحة مين و ذكراكم قدام احفادكم تكون شكلها ايه انا قلت البوقين اللي تاعبيني و خلاص عشان قلبي تعب بقي

الأحد، 5 فبراير 2012

شهداء بورسعيد

بعتذر على نشر الصورة المفزعة دي لكن علشان يعرف المصريين ما حدث لابنائهم من (الشهدااااء) رغم انف من يعترض على هذه الكلمة واقول له ربنا يرحمهم لأنهم ابرياء حتي الشهداء ما سلموش من سفالة البعض امثال الحقير خالد عبدالله اللي بيقول هيقولوا لربنا انهم كانوا بيتفرجوا على ماتش!!! واقوله ربنا يوريني انا شخصيا في ولادك و اهلك يا كلب ياللي بتسخر من ارواح الابرياء ده انت حافظ مش فاهم ولا عمرك هتفهم رحمة ربنا فاقت الحدود ياللي بتتكلم باسم الدين الدين بريئ منك و من امثالك اذا كنت تستشهد بحديث الرسول (ص) اقول لك انه ذكر الذي استشهد في سبيل الله والمبطون اي مريض البطن وصاحب ذات الجنب اي القرحة و الحريق اي المحروق و الغريق والذي يموت تحت الهدم ، والمرأة تموت بجُمْع شهيدة يعني الحامل طيب هو المحروق ده مش ممكن يكون سارق او قاتل او مرتكب فحش ولا الغريق ده مش ممكن يكون هربان من جريمة ولا الحامل دي مش ممكن تكون حامل من زنا؟؟ لكن ده ربنا اللي يحكم فيه وربنا خلق لنا منطق و فطنه و عقل لنتدبر رحمته فما بالكم يا ذوي الالباب (بالمغدور به و المظلوم) البريئ الذي كان يشاهد و يشجع رياضة ان كان شهيد بالمعني ولا شهيد الغدر دي بتاعة ربنا احنا اللي علينا نجيب حقه و نترحم عليه و نخرس خالص لانه الكلام في الامور دي كلام اقل ما يقال عليه انه قذر .شاب في ريعان الشباب لا يعرف ماذا فعلت يداه ليلقى به من اعلي او يشنق بجنزير او يفرم تحت باب وزنه 400 كيلو و يداس عليه دون ان يقدر على الدفاع عن نفسه ...لن تدخل يا عم الشيخ كفتة في حكم الله ولا في سعة رحمته هو فقط الذي يحكم وهو ايضا الذي اعطي لنا عقول لنفكر و نتفكر في حكمته و رحمته فلا تتقول علي الله يا غليظ القلب والعقل لان رحمته وسعت كل شيئ لكن امثالك لا يعرفون غير التكفيير و التنفيير من له قلب فليشعر و من له عقل فليفهم ومن ختم علي قلبه و عقله فلا مكان له هنا و حسبي الله و نعم الوكيل

من أنا

صورتي
واحدة بتموت في ارض مصر و حاسب اللي يتهور يتعور