الأربعاء، 28 مايو 2008

المنحرفين سلوكيا




استحملوا بقى الصور والبوست واللي متضايق يخرج ويريح نفسه


من هم المنحرفين سلوكيا؟؟؟

و مين فينا يقدر يحكم على انسان اذا كان منحرف ولا لأ؟؟؟


بيغيظني اوي الناس اللي فاكرين انهم هيصلحوا الدنيا لما كل واحد يدين التاني و ميبصش على غلطاته زي واحدة مقطعه في فروة جارتها ولا قريبتها ولا حتى صاحبتها عشان هي بنت ايا كسكيليا قليله الادب و كانت لابسه مايوه عالبحر ولا شافتها مصاحبه ولاد ولا استاذ فالجامعه المفروض انه مثقف لكن مربي مقشه تحت بقه وبيطهد بنت ويحطها في دماغه عشان سافله و ماتربتش و لسه لغايه دلوقتي ماتحجبتش الموضوع يا جماعه حريه شخصيا ليه بنحكم على الناس من لبسهم او من طريقه كلامهم لو متفتحين حبتين على طول يبقوا سفله؟؟؟ مين يقدر يدين انسان زيه اي ان كان لبسه او تعبيره عن نفسه أو حتى ميوله الجنسيه أعتقد ان كل انسان عاقل مسئول عن نفسه و عن تصرفاته ولو بيحترم اللي قدامه و اسلوبه محترم مع اللي قدامه و مبيئذبش حد لا بتصرفاته ولا بكلامه يبقى حر ومش ده اللي نهاجمه ولا نقول عليه منحرف


أتمنى من كل قارئ انه يفكر كويس قبل ما يحكم على غيره هديلكم مثل بسيط اول ما فتحت المدونه كنت حطه صوره لبنت لابسه بيكيني وكنت منتظره التعليقات عشان اشوف الناس هتتصرف ازاي وهعرضلكم بعضها مع احترامي للي كتبوها طبعا لكن ياريت نقف مع نفسنا و نوسع مدارك افكرنا شويه


(بدون ذكر اسامي)


يقول...الموضوع جميل و تعليمى بدرجة كبيرة لكن البكينى بتاعك ده من اى كوكب؟

يقول...ياعيني عليكي ياسوسكا يااختي تعرفي انا لما شفت صورة البروفايل استغربت بس لما دخلت وقريت الموضوع لقيت تفسير منطقيانت محرومه عندك من الجمالمن اللون الخمري


يقول... جاب لكى الخلاصة على فكرةههههههههههههههههههههه بس بجد هيا دى صورتك؟انا بتمنى تشيلها سواء كانت صورتك اولا لاءةاصلها بصراحة مزة:)والشباب هياخدوا ذنوبتحياتى يا قمر


يقول...بس سيبك انتى .. ما انتى كميلة اهو ومننا وعلينا .. مستغربالك صورة البروفايل بتاعك بصراحة


يقول...و بوست رائع بس الصورة الاجمل صورة الموزة اللى فى البروفيل صورة مووووووووووووووووز

يفول...اول زيارة لي في مدونتك بس ممكن الله يكرمك .. هو يعني مجرد اقتراح وليكي انك تاخدي بيه او ماتاخديش ممكن الله يكرمك تغيري الصورة اللي في البروفيل


وده بقى احد الناس الظريفه اللي بعتتلي ايميلات
Your picture in your blog is verry exiting...!

(أرجو من أصحاب التعليقات السابقه ما يتضايقوش انا بعرض وجهه نظري زي ما هما عرضوا وجهه نظرهم برضو)


دي كانت مجرد صورة لبنت حلوة من النت لكن الفكر اني مادام حطاها ابقى انسانه منحرفه و تخيلوا فيه ناس ماكانتش بتعلق عندي عشان الصورة دي الى كل انسان حر فكر وحرر افكارك العتيقه متحكمش على انسان زيك لمجرد شيئ هو مرتاح فيه و مابيسببلكش اي مضايقه بيه واللي هيقوللي اصل الست اللي مش متغطيه بتخليني اخد ذنوب هقوله احترم انت نفسك يا حبيبي وغض بصرك واللي هيقوللي ان صوت المرأة عورة هقوله اقعد في بيتكم عشان الست نص المجتمع والسيده عائشه رضي الله عنها اوصانا الرسول واوصى من حوله ان خذوا نصف دينكم من عائشه يعني كانت بتتكلم وبتقول اللي اتعلمته من الرسول (ص) ماكانتش بتشاور واللي هيقوللي مفيش صداقه بين راجل و ست هقوله لو مش عايز يا بابا ما تتمحكش وارحم شبابك انت بس انا شايفه ان السلوك المنحرف للشخص اللي بيعيب على غيره وبيلغي تفكيره مفيش حد له سلطه على حد وزي ما قال سيدنا عيسى من منكم بلا خطيئه فليرمها بحجر وده لمؤاخذه كان بيتكلم عن واحده عاهرة فاهمين يا بانيأدمين والا انتوا شايفين ايه؟

هناك 17 تعليقًا:

رئيس جمهوريه نفسى يقول...

tاولا محدش ليه حق يحكم على حد بالمظهر
لانى المظهر بيخدع فى اوقات كتير جدا ومش ممكن نحط تعريف او معنى يحصر الشخصيات المنحرفه لانى اولا المنحرف منحرف من نظر الاخرين والانحراف نسبى عندهم بمعنى انى الى حشوفه انا منحرف انتى لا وهكذا فياريت نسيب كل فرد فى حاله بدل مش بيضر حد

غير معرف يقول...

أنا معاكى فى موضوع "أنت حر ما لم تضر"
بس فى الواقع فى حاجة اسمها عادات و تقاليد تُحتَرم و دين علشان احنا مش أجانب.
اسمحيلى أنا فى عبارة فى البوست حاحطها زى ما هى:

" واللي هيقوللي اصل الست اللي مش متغطيه بتخليني اخد ذنوب هقوله احترم انت نفسك يا حبيبي وغض بصرك"

جميل أوى هو حيغض بصره بس انتِ ليه تاخدى ذنب النظرة الأولى؟؟ليه تحطى فى البروفايل واحدة لابسه بيكينى و تحطى نفسك موضع شبهة؟؟؟ (كده انت حرة بس انت بتإذى نفسك)

تانى حاجة صوت المرأة عورة بمعنى انها متمشييش تضحك بصوت عالى, ما تتمايعش بصوتها و تثير أى شاب فى قلبه ضعف أو ممكن يضعف.

كمان احنا ليه بننسى ان مصر دولة اسلامية؟ يعنى لو حتى البنات مش عاوزة تتحجب على الأقل يحتشموا و منرجعش نقول فى ال70 كانوا بيلبسوا و يعملوا
ماهو ده كان غلط كمان دلوقت الشباب مش لاقى يتجوز. و يوم ما حيتجوز حيفكر فى واحدة تربيلوا ولاده صح (مش حقولك محجبة عشان فى بنات حجابهم زى قِلته بس حقولك واحدة فاهمة الدين صح و عاوزة تحسن من نفسها)

أنا أسفة لانفعالى بس بجد أنا كان نفسى أبعتلك التعليق ده على الميل بس أنا معرفوش كمان بجد أنا غيورة على دينى و بحبلك الخير

تقبلى مرورى,
ليلى

Coca يقول...

صح كل واحد ماشي وفاكر نفسه ربنا
واللي بتكلم دايما علي غلطات الغير هو اول غلطان
لانه مش شايف نفسه غير في مرايه ملعاه ملاك

Unknown يقول...

اولآ يا سوسكا ياريت تشيلي البتاه بتاعة تأكيد الكلمه دي علشان انا بتخنق منها

بصي للأسف دي عادة عند العرب كل واحد شايف انه حكيم زمانه و فيلسوف عصره و مثواه الجنه في الاخره و لازم يفرض افكاره علي الناس لانه بيفهم احسن منهم

فيبتدي يدخل في اللبس و يقسم الناس علي اساس مظهرهم ده متدين اوي و ده نص نص و ده وحش هايروح النار و دي متبرجه و دي مؤمنه و كلو علي اساس المظهر بس مالوش دعوه بالاخلاق

و طبعآ لو اختلفتي معاه لي طول يرميكي بالكفر و فساد العقيده لانه مقتنع انه الحاكم بأمر الله و مفوض لاصلاح البشريه

كل واحد حر في نفسه طول ماهو مش بيأذي حد حتي لو غلط هو يتحمل نتيجة غلطه

بوست جميل

تحياتي

بنت مصرية يقول...

الزعيم الكبير اوي

تحياتي ليك ولكلمتك الحرة دايما منورني

بنت مصرية يقول...

ليلي

اولا اهلا بيكي عندي هنا واحب اقولك ان وجهه نظرك طبعا تحترم
بس مالهم يعني الاجانب كفرة؟؟؟ يا أختي الفاضله الاجانب ولا اللي مش محجبات وتصنيف دول مسلمين و دول لا دي وجهه نظرك لكن انا بقى بالنسبالي الانسان لربنا اللي خلقه وهو برضه اللي هيحاسبه على افعاله وتصنيفك لبلدنا انها دوله اسلاميه ده من وجهه نظريه الشخصيه اوي محبوش لأننا طول عمرنا عايشين مع بعض مسلمين و مسحيين وزمان يهود كمان انا مليش دعوة فالمتعصبين تعصب اعمي من المسلمين او المسلمين ولا بتكلم عن الصهاينه اللي ملهمش دعوة برضه باليهود احنا مصرييييييييين ياريت تفهمي وجهه نظري وبلاش ندخل الدين فكل حاجة لان ده اللي مخلينا مبنشفش قدامنا الدين سماحه و معامله و مش معنى كده اني بقول للناس يلا كله يمشي قالع هدومه لكن كل واحد حر قالع لابس هو حر و ربنا اللي بيحاسب لاانا ولا انتي
الست زمان كانت مبتخرجش من بيت جوزها او بيت اهلها عشان كان فيه اللي بيعولها وكان فيه جهل دلوقتي حضرتك بتكوني جنب زميلك فالمحاضرة او فالاتوبيس او في الشغل والمحترمه بتكون بشخصها مش بهدومها
ياريت متزعليش برضه من وجهه نظري وتقيلي تحياتي

بنت مصرية يقول...

وعلى فكرة انا ايميلي موجود عالبروفايل يا ليلي و اي خدمه

بنت مصرية يقول...

كوكا اهلا بيكي فالمدونه و منوره وكلامك يدل على تفتج و فكر واعي بتمنى تنوري المدونه دايما

بنت مصرية يقول...

ايمي
اولا اوعدك اشيل البتاعه دي بس لما اعرف بتتشال ازاي ههههههه
معرفش الناس دايما ليه فعلا بتحكم على الناس بمظهرهم مع ان المظهر ملوش دعوة بالجوهر اتمنى اني الاقي كل الناس بتفكر قبل ما تحكم على حد وانا مش هسكت هههه
منور يا باشا

غير معرف يقول...

hi soska:
i never been here for a while but when i came i found u talking about a very importnat issue.
hakamel 3araby ba2a 3ashan 2a3raf 2a3abar bera7ty,el nas fe masr ya soska nas fadya mesh waraha 7agah f mesh warahom 3'eer enohom yetkalemo 3ala el nas o ana masala2 mesh shayfa en sl sorah elly enty konty 7ataha feha 7agah 2aslan 7ata en kanet sortec what a big deal 2 wear a pickini,and the onlt way 2 mesure teh person infront of u is the way he looks 2 himself so if he respect himself i am pretty sure that u gonna respect him but if he dont respect himself as a result he's not gonna respect anybody so is this case i consider him as a bad person no matter what he wear,what's his relegion whats his sexuality coz this is not what ppl care about while dealing with other peopls
yalla nice post ya fandem
salamoz
and plz cancel the word verifecation

Coca يقول...

هاي يا سوسكا
انا بعتلك ميل علي الجي ميل بتاعك
مطلوب القبض عليكي

Unknown يقول...

بصي يا سوسكا و ركزي معايا علشان اقولك بتتشال ازاي

انتي بتدخلي علي الsettings

و بعدين علي comments

هاتلاقي enable word verification

انتي تعملي nooo

و تريحينا و تريحي نفسك

سلام يا قمر

مدحت محمد يقول...

ماشى معاكى انه مش بالمظهر نحكم فلان منحرف ولا مش منحرف

بس فى مناظلر الواحد بمجرد انه يشوفها

ينحرف

بنت مصرية يقول...

sola
ah wenabi yakhti 3andek 7a2 hhhhhhhhhhhhhh

بنت مصرية يقول...

coca
معلش يا كوكا ياختي اصلي كنت واخده سكينه فجنبي و مفرهده المرة اللي فاتت عشان شوايه مشاكل فالشغل اشوفك تاني بقى يا كوكا
باي باي

بنت مصرية يقول...

ايمي

اديني مركزه اهو حتى شوفي زي سفروت هههههه
اجرب بس موعدكيش اصلي مليش خلق على الكلام ده

بنت مصرية يقول...

مدحت

اكيد بصراحه ومتزعلش مني يعني انا زي اختك الكبيرة انت اللي عندك استعداد تبقي منحرف و طلاما عندك الاستعداد يبقى الف مبروك و انا افرحلك هههههه

من أنا

صورتي
واحدة بتموت في ارض مصر و حاسب اللي يتهور يتعور