الأحد، 16 نوفمبر 2008

اخر ما ابدع احمد فؤاد نجم



نؤيد سيادتك



نؤيد سيادتك لفترة جديدة



نكمل خلالها المسيرة السعيدة



و بالمرة فيها نبيع الحديدة



مفيش حاجة تانية نبيعها خلاص



*****



نؤيد سيادتك لأجل المزيد



من اللي تحقق بفضلك أكيد



بقينا خلاص ع الحميد المجيد



و ربك لوحده ف ايده الخلاص



*****

نبايع سيادته ولا حد غيره



كفايا علينا نبرطع في خيره



و نوم شعب مصر العظيمة و شخيره



يقول للحرامي ما تسرق كمان



*****



نبايع سيادته وابنه وحفيده



مفيش زي فكره قديمه و جديده



خرابك يا مالطة حيحصل بايده



ومين فيكي يعني بيسمع آذان



*****

نبوس إيد سيادتك و رجلك كمان



تخليك معانا يا ريس عشان



وجودك ضرورة فرضها الزمان



و من غير وجودك حقيقي نضيع



*****

دي مصر بتاعتك و احنا ضيوفك



كفايه علينا يا ريس نشوفك



و عاذرين سيادتك و فاهمين ظروفك



عليك بس تؤمر و احنا نطيع



*****



في جزمة سيادتك كلابك يبوسوا



و فوق الغلابة بجزمهم يدوسوا



و شعبك ليلاتي يا ريس غموسه



مذلة و مهانة و حوجة و مر



*****

لكن يعني ما دمنا شعب انتساب



و دايما وأبدا ف حالة غياب



متعملش لينا يا ريس حساب



دي عزبة سيادتك و فيها انت حر



*****



و دستور مدستورش مش فارقة خالص



كلام فاضي كله يا فندم بناقص



كفايا علينا الفساد اللي ماصص



عرقنا و معشش و ضارب جذوره



*****



و ايه يعني تهري جتتنا البلاوي



يوماتي كوارث فضايح رشاوي



كفايا علينا القعاد في القهاوي



بنستنى لما الوريث ييجي دوره



احمد فؤاد نجم


هناك 5 تعليقات:

Desert cat يقول...

فى الحقيقة ابو النجوم طول عمره مبدع
اشكرك جدا على نشرك للكلمات اللى بتوجعنا فى كل وقت
:)
مودتى

رئيس جمهوريه نفسى يقول...

اوجز فا انجز واصاب كبد الحقيقة بس للاسف مهما اتكلمنا محدش حيفهم او يحس او يعى معنى الكلمات فلنا اللة

بنت مصرية يقول...

Paulo
I will visit it and nice to c u here

بنت مصرية يقول...

منوره يا قطه واي خدمه

بنت مصرية يقول...

الريس
منورني و اكيد مهما قلنا مفيش كلام يعبر
مش تاكدها انت بقى و تخلصنا

من أنا

صورتي
واحدة بتموت في ارض مصر و حاسب اللي يتهور يتعور