الثلاثاء، 8 أبريل، 2008

قانون المرور المصري ' 2008' طازة من الكنترول






القاعدة الأولى:

لو عربيتك كبيرة أو قديمة ، أستخدم المبدأ القانوني: اللي خايف على عربيته يوسع!!
ملحوظة: ابعد عن سكة العربيات المخرشمة ، بيسوقوا بنظرية ضربوا الأعور على عينه!!


القاعده الثانيه:

البوز بيز Booze Base : اللي يدخل ببوز عربيته الأول للتقاطع هو صاحب أولوية المرور! احرص على أن تكون صاحب أول بوز.

ملحوظة: لا تطبق الـ Booze Base مع أي لوري أو أتوبيس ، حرصاً على بوزك لا مؤاخذة.


القاعدة الثالثة:

الإشارات تكشف نواياك للأعداء ، أياك أن تستخدمها!


القاعدة الرابعة:

لا تترك مسافة للأمان بينك و بين السيارة التي أمامك فهذا له عدة مخاطر:

1. عربية ثانية هتمليء الفراغ في ثواني و برضه ما يبقاش فيه مسافة بينك و بين الي قدامك ، كل الي كسبته انك اتأخرت لورا شوية.

2. تعطي فرصة للعيال يعملوا غرز قدامك.

3. كل المشاة حيغمضوا عينيهم و يعدوا من الحته دي.

4. الي وراك حيقعد يزمر - لو كان مؤدب - أو تسمع شوية أسامي حيوانات لو كان سواق تاكس - مؤدب - ، أو حيخبطك من ورا لو كان سواق ميكروباص - و دول مفيش حد منهم مؤدب.

الإشارات مش معمولة علشان تنظم المرور ، معمولة علشان شكل القاهرة يبقى متحضر بس!

اعتمد على العساكر ( مع تحملك كامل المسؤلية لو واحد منهم شاورلك تعدي و بلدياته الناحية الثانية فتح السكة للوري ) أو يفضل أن تستعمل البوز بيز ( راجع القاعدة الثانية ).


القاعدة الخامسة:

اذا كنت مش واقف في الصف الأول في الاشارة اعمل حسابك تزمر بشكل متواصل و هستيري أول ما الأشارة تفتح ، لأن الناس الي قدام بيبقوا واقفين في الاشارة من زمان و جايز جداً يكونوا ناموا!!


القاعدة السادسة:

معظم الحوادث تحدث في التقاطعات أول الأشارة ما تحمر، كل ما عديت الإشارة الحمراء أسرع كل ما قلت فرصة انك تتخبط!


القاعدة السابعة:

الشارع مكان مقرف ، سوق بأسرع ما يمكن حتى تتخلص من هذا الهم بسرعة ،

الناس الي ماشيين بالراحة مرضى نفسيين بيستمتعوا بالعذاب ، يستاهلوا الي يجرى لهم.


القاعدة الثامنة:

من حقوقك الدستورية أن تركن أمام باب المحل الذي تريد أن تشتري منه ، اذا سبقك واحد ابن ستين في سبعين و ركن قدام الباب ، فمن حقك أن تقفل عليه و تركن صف ثاني أو ثالث، و مش مهم لو الشارع اتقفل ، ايه يعني أما الناس تتعطل عشر دقائق علشان تستمتع بحقوقك الدستورية؟ هيا يعني الدنيا طارت ولا كان وراهم الديوان؟


القاعدة التاسعة:

م ن حقك أيضاً أن تخرج من مكان انتظارك في أي لحظة تشاء ، اكسر الدركسيون شمال و اطلع ، أي حد ماشي في الشارع لازم يقف لك فورا ً، راجع البند السابق.


القاعدة العاشرة:

إحترس من ثلاث أنواع من السائقيين بيسوقوا و كأنهم مش ممكن يموتوا:

1. العيال الروشين الي بيلعبوا Computer Games و فاكريين إن ممكن يكسبوا Life زيادة لو ساقوا أسرع.

2. موتوسيكلات توصيل الطلبات ( Home Delivery ).

3. سواقين الميكروباص.

ملحوظة: إوعى تحاول تثبت لحد منهم إن فكرته غلط. فاهمني!!!.


القاعدة الحادية عشر:

لما تشوف حادثة لازم تهدي و تتفرج - مش مهم تساعد - الحجات دي دمها أخف من الأخبار المملة بتاعة التلفيزيون ، و بعدين لما الطريق وراك يقف تحمي المجتمع من حادثة تانية.


القاعدة الثانية عشر:

الكناسين لازم يحللوا اللقمة الي بياكلوها ، حاول تنفعهم و ترمي أي حاجة من الشباك.


القاعدة الثالثة عشر:

لما تخلص سيجارة أوعى تحطها في الطفاية ، ارميها من الشباك أول ما تشوف واحد بموتوسيكل معدي جنبك ( علشان يحرم يعمل غرز ).


القاعدة الرابعة عشر:

من حقك أن تعبر الشارع في أي وقت و من أي مكان.


القاعدة الخامسة عشر:

اذا كان هناك سيارة قادمة اعمل نفسك مش واخد بالك و عدي براحتك خالص،ما تخافش، هوا حيقف، هو اهبل يدوسك و يودي نفسه في داهية؟


القاعدة السادسة عشر:

اياك أن تنظر نحو السيارات القادمة ، أعبر الطريق و ظهرك لها حتى لا يشك أحد قائدي السيارات أنك تراه و يحاول يخوفك علشان تقف انت.


القاعدة السابعة عشر:

حتى لو شفته أوعى تخاف - خصوصاً لو معاك مراتك - تبقى راجل ملو هدومك و تخاف من حته عربية؟ عرض قفاك و سيبه يتفلق.


القاعدة الثامنة عشر:

الرصيف ليس للمشاه ، بل لركن السيارات و فرشات الباعة الجائليين و المحلات... الخ ، لذلك يحق للمشاة السير في وسط الشارع ، لمزيد من الأمان ، راجع القاعدة السابقة.

هناك 8 تعليقات:

ba7re يقول...

قانون تحفة
بصفتى حقوقى
اراه متكامل الاركان
و متماشى مع مصادر التشريع
و اهمها العرف
حد فاهم حاجة
سلام عليكم :)

بت خيخة وأى كلام يقول...

القاعدة التاسعة عشر
لو عندك زكام ومافيش مناديل معاك
بصباعين السبابة والابهام اضغط بيهم على مناخيرك وطلع البرابير منهم والبرابير هتقع لوحدها على الارض


القاعدة العشرين
لو عندك بلغم فى زورك ولو حتى معاك مناديل وفر مناديلك لحاجة تانية اهم
والبلغم تفه فى الشارع

يععععععععععع
قاعدتين مقرفين اوى
ايه القرف اللى انا كانباه ده

تحياتى ليكى يا سوسكا
اختك خيخة

EmY يقول...

هههههههههههه شكلك حريفة سواقه و لخصتي قانون المرور المصري

فعلا كل ده بيحصل

كان عندي واحده صاحبتي مش مصريه جالها صرع من الشارع عندنا

أنا إنسان يقول...

رائع
بس اعتقد انه منقول
؟؟؟؟؟؟!!!!!!!!!

soska يقول...

بحري

والله اللي تشوفه بما انك راجل انون انت ادرى:)))

soska يقول...

ياخيخة ايه الالرف ده هرجع خلاص
معرفتش اتمزج من كوباية الشاي الي بشربها بعد كلامك الاييككيييي
لأني تخيلت ورجعت بالذاكرة وانا راكبه تاكسي وعمو السواق بيطلع كل اللي في قلبه من بلغم ويطرده زي ما يكون بيشوط كورة ههههه و فنفس \ات الوقت و مع نفس التاكسي اللي مش هنساه ابدا خصوصا ان ريحة التاكسي كانت عامل زي مراحيض ميدان التحرير طلع وشه من الشباك وبإيده اللي عايزة قطعها راح مديها نفّة جامدة خرج فيها النخاع الشوكي هههههههه على رأي سهير البابلي نفسي اطلع الشعب برة وامسح البلد وانضفها واحمي كل مواطن يدخل تاني ههههه

soska يقول...

ايمي والنبي ياختي انا لو قتلوني لايمكن اسوق في العاصمة وطبعا ده مش كلامي انا ده كلام خبراء اجانب هههههههههههه

soska يقول...

انسان
اكيد منقول وانا هنظم المرور كمان يابني ده قانون يعني الحكومة اللي عاملاه ولسه انشاء الله قريب نجيب الداستور الجديد ههههههههه

من أنا

صورتي
واحدة بتموت في ارض مصر و حاسب اللي يتهور يتعور